Иғтибар! Рубрикабыҙҙы яңыртабыҙ!

Зөлфиә Шәфҡәт ҡыҙы Ҡәйепҡолова Баймаҡ районының Һаҡмар ауылында тыуып үҫә. Шунда уҡ урта мәктәпте тамамлағас, 1989 йылда Сибай медицина училищеһына юллана. 1991 йылда шәфҡәт туташы һөнәренә эйә булған йәш белгес Бикеш ауылы участка дауаханаһында хеҙмәт юлын башлай. Ике йыл эшләгәндән һуң, 1993 йылда БДУ-ның Сибай институтына мәктәпкәсә белем биреү бүлегенә уҡырға инә. 1997 йылда тәрбиәсе һәм башланғыс кластарҙа инглиз теле уҡытыусыһы һөнәрен алып, ҡаланың “Ирәндек” лицейында хеҙмәт юлын мәғариф өлкәһендә дауам итә. Шул уҡ ваҡытта ул М. Аҡмулла исемендәге Башҡорт дәүләт педагогия университетында ситтән тороп уҡып, “Уҡытыусы-логопед” һөнәрен ала. 2001 йылдан алып хәҙергә тиклем ул “Аҡһылыу” балалар баҡсаһында балаларға өндәрҙе дөрөҫ ҡуйырға ярҙам итә. Үҙ өҫтөндә туҡтауһыҙ эшләгән белгес булараҡ, 2023 йылда өҫтәлмә белем алып, педагог-дефектолог һөнәренә лә эйә була. Тормош иптәше Наил Юлай улы менән ике ҡыҙ һәм бер ул тәрбиәләйҙәр. Фиҙакәр хеҙмәте өсөн күп кенә маҡтау грамоталары, дипломдар, рәхмәт хаттары менән бүләкләнгән. Зөлфиә Шәфҡәт ҡыҙы Ҡәйепҡолова коллегаһы Розалиә Сәғит ҡыҙы Илбулова менән берлектә ”Тылсымлы өндәр иленә сәйәхәт” методик ҡулланмаһын әҙерләгән. Туған телде өйрәнеүҙә, баланың телмәрен үҫтереү, аралашыу өсөн төрлө педагогик технологиялар ҡулланыу мөһим. Башҡорт телендә таҙа һөйләшеп, аралашыу өсөн туған телебеҙгә генә хас булған өндәрҙе - ҡ, ғ, һ, ҫ, ҙ, ө, ә, ү, ң - үҙләштереү мотлаҡ. Тәҡдим ителгән методик ҡулланма ябайлығы менән айырылып тора. Бирелгән карточкалар ярҙамында төрлө уйындар ойошторорға мөмкин. Унда телмәр үҫтереү һәм логик фекерләүҙе үҫтереүҙә ҡулланылған яңы технологиялар алғы планға ҡуйылған һәм туған телдә һөйләшергә өйрәтеү осоронда бик ҡулайлы методик ҡулланмаларҙың береһе булып тора. Мәктәпкәсә йәштәге балаларҙың телмәрен үҫтереүҙә инновацион алымдар ҡулланыу, яңы стандарт талаптарының белем йөкмәткеһен заман талаптарына тура килтереп, уның сифатын күтәреү бурыстарын хәл итеүҙе маҡсат итеп ҡуя. “Тылсымлы өндәр иленә сәйәхәт” методик ҡулланмаһы тап ошо талаптарға тап килә лә инде.