Файҙалы һөт ризығы – кескәйҙәргә.

Хәтерегеҙгә төшөрәбеҙ, "Һөт кухняһы" Башҡортостан Башлығы инициативаһы менән 2019 йылда булдырылды. Әйткәндәй, хәҙер ғаризаны онлайн рәүештә “Госуслуги” республика порталы аша һәм МФЦ үҙәгенең “Минең документтарым” офистарында тултырырға мөмкин.

Продукция сифаты федераль кимәлдә уңышлы билдәләнде. 2024 йылда балалар өсөн әҙерләнгән эремсек “Рәсәйҙең иң яҡшы 100 тауары” конкурсы лауреаты булды, ә бер литрлы бутылкаларҙағы һөт “Беҙҙең бренд”  конкурсында гран-при яуланы.

“Бер нисә йыл элек беҙ республикала һөт кухняларының төбәк селтәрен булдырҙыҡ, бер нисә завод төҙөнөк, продукция етештереүҙе яйға һалдыҡ, - тип билдәләне Радий Хәбиров. - Әммә беҙҙең бурысыбыҙ - өлгәшелгән һөҙөмтәләрҙе теркәү түгел, ә алға ынтылыу. Ниндәй яңы объекттар төҙөрбөҙ, продукция ассортиментын нисек киңәйтербеҙ, сауҙа үҙәктәрендә күпме таратыу нөктәһе булдырырбыҙ һәм был ҡасан буласағын аңлау мөһим.

Төбәк Башлығы республиканың Сауҙа һәм хеҙмәтләндереү министрлығына "Һөт кухняһы" системаһын үҫтереү буйынса аныҡ пландар әҙерләргә ҡушты.