БЕҘҘЕҢ КАТОКТА

Осһоҙ-ҡырыйһыҙ
Киң матур ялан,
Ул йомшаҡ ҡарҙан
Юрған ябынған.

Яланды ярып
Аҡҡан йылғаның
Беҙ белеп алғас,
Һыуы туңғанын.

Көҙгөләй боҙҙан
Үттек шыуышып,
Бер-беребеҙҙе
Киттек ҡыуышып.

Ялтыр боҙ шыжлай
Аяҡ аҫтында,
Шат йырҙар яңғырай
Алыҫ-алыҫҡа.

Күңелле лә һуң
Шундай саҡтарҙа, —
Бойоғоу юҡ һис
Беҙҙең сафтарҙа.

Спорт менән беҙ
Гел күнегәбеҙ,
Шуға көр күңел,
Уҡыу ҙа еңел.

Ҡурҡытмай беҙҙе
Ҡышҡы һыуыҡ та,
Һәр саҡ күңелле
Беҙҙең катокта!

Нәжип ИҘЕЛБАЙ

Фото: Зиннур Боҫҡонов