АТҠА МЕНДЕМ

Атҡа менгәс, ҡапыл буйға
Үҫтем һымаҡ,
Күк толпарҙа күл-йылғалар
Кистем һымаҡ.

Мине һынап, атай ҡарай:
"Ҡурҡырмы был?
Тап егетсә теҙгенде ныҡ
Тотормо был?"

Гүйә, һыбайлы булып мин
Торҙом сафта.
Малайҙарҙың күҙе шарҙай
Булды аҫта.

Ҡурҡыу ҡасты. Күҙем күргән
Яҡҡа елдем.
Күрегеҙ мине: атҡа мендем!
Атҡа мендем!
Юҡ, елмәнем, үттем генә
Байтаҡ ара.
Теҙгенде бит атай тотоп
Атлап бара.

Муса ҒӘЛИ