"Аҡбуҙат" балалар баҡсаһы менән танышыуын дауам итә!

Күмертау ҡалаһының 27-се “Ҡыңғырау” (“Колокольчик”) балалар баҡсаһы 1986 йылда асылған. Әлеге ваҡытта бында 15 төркөм эшләп килә. 2 төркөм мөмкинлектәре сикләнгән балаларға тәғәйенләнгән. 2018 йылда, ата-әсәләрҙең һорауы буйынса, башҡорт телле “Нарцисс” төркөмө асыла. 8 йыл дауамында был төркөмдә юғары категориялы педагог – Сәйәхова Альбина Минеғәзиз ҡыҙы эшләй. “Нарцисс” төркөмө балалар баҡсаһының мәҙәни һәм рухи усағы хәҙер. Альбина Минеғәзиз ҡыҙы һәр ваҡыт даими эҙләнеүҙәр, яңы белем алыу өҫтөндә эшләй. Тәрбиәсенең төп эш методы: талап итеү түгел, ә ҡыҙыҡһындырыу, ылыҡтырыу. Тәрбиәләнеүселәрҙаң ата-әсәләре лә һәр ваҡыт төрлө сараларҙа әүҙем ҡатнаша, бар яҡлап тәрбиәсегә ярҙам итергә тырышалар. Ғаилә традицияларына, халыҡ ижадына - әкиәттәргә, йырҙарға, биҙәү-ҡулланма сәнғәтенә айырыуса иғтибар бүленә. Ғаилә менән әкиәт уҡыу, уҡылғандар буйынса фекер алышыу, аҙаҡ шул әкиәттәрҙе сәхнәләштереү ҙә киң ҡулланыла.