Өфөлә III Бөтә Рәсәй креатив индустрия мәктәптәре съезы үтәсәк

13-14 ноябрҙә Өфөлә III Бөтә Рәсәй креатив индустрия мәктәптәре съезы үтәсәк. Был хаҡта республиканың мәҙәниәт министры Әминә Шафиҡова Башҡортостан Башлығы Радий Хәбиров уҙғарған оператив кәңәшмәлә хәбәр итте. Сараны ойоштороусылар - Рәсәйҙең мәҙәниәт Министрлығы, Башҡортостан Хөкүмәте һәм креатив индустриялар Федерацияһы. Практик проект эшмәкәрлеген тикшереү өсөн Өфөгә Рәсәйҙең 52 субъектынан 170-тән ашыу етәксе, уҡытыусы, эксперт һәм белгес киләсәк. Шуныһы мөһим: Башҡортостан төбәктәр араһында беренсе булып был съезды ҡабул итә – ошоға тиклем уны Мәскәүҙә генә үткәргәйнеләр. Бындай мәртәбә республиканың ошо өлкәләге уңыштары менән бәйле. Әминә Шафиҡова белдереүенсә, съезд Евразия фәнни-белем биреү үҙәгенең юғары уҡыу йорттары араһындағы студенттар кампусының Геном үҙәге базаһында, шулай уҡ Башҡорт дәүләт ҡурсаҡ театры майҙансығында үтәсәк.