Башҡортостан Хөкүмәтендә уҡыу йорттарын ремонтлау барышы тикшерелде

Башҡортостанда яңы уҡыу йылына 35 мәктәп, өс колледж һәм ике балалар баҡсаһы яңыртыласаҡ. Бер йыллыҡ цикл объекттарының төҙөлөш әҙерлеге – 84, ике йыллыҡ цикл объекттарының әҙерлеге 98,15 процент тәшкил итә. Был хаҡта Радий Хәбиров уҙғарған оператив кәңәшмәлә республика Хөкүмәте Премьер-министрының беренсе урынбаҫары Урал Килсенбаев хәбәр итте.

Әлеге ваҡытта бөтәһе 12 муниципаль берәмектә эштәр бара. Бөрйән районының Аҫҡар, Саҡмағош районының Имәнлекүл һәм Тәтешле районының Яңы Тәтешле ауылдарында, Өфөнөң 4-се мәктәбендә эштәр яҡшы темпта бара. Стәрлебаш коррекция мәктәп-интернатында капиталь ремонт тамамланған. Ике йыллыҡ цикл объекттары араһында яңы уҡыу йылына Стәрлетамаҡ ҡалаһының 1-се, Мәләүез ҡалаһының 8-се мәктәбе һәм Учалы коррекция мәктәп-интернаты хәҙерҙән әҙер. Мәғлүмәт һәм фотолар - "Глава республики Башкортостан" сайтынан