Осрашыуға беҙҙең күп сәбәп

1"А" һәм 4 "А" класы уҡыусылары телсән дә, отҡор ҙа, бик әүҙем дә икән. Етеп килгән Башҡорт теле көнө алдынан, әлбиттә, беҙҙең әңгәмә туған тел, тарих, мәҙәниәт, йолалар, шәжәрә хаҡында барҙы. Балалар үҙҙәренең тамырҙарын, быуындарын да бик яҡшы белә икән. Ҙур теләк менән таҡтаға сығып, 4-шәр быуындарын яҙып күрһәттеләр.

Дим биҫтәһендә йәшәгән балалар шиғыр ятлауҙа ла бик оҫта! Туған телдәрендә шартлатып шиғыр һөйләп ҡыуандырҙылар. Видео ла һалырбыҙ!

Баҫма менән хеҙмәттәшлек иткән мәктәп хеҙмәткәрҙәре - Рита Дамир ҡыҙы Батырова, Эльвира Ғәйнулла ҡыҙы Миһранова, Гөлгөнә Сабит ҡыҙы Бикмөхәмәтоваға ҙур рәхмәтебеҙҙе еткерәбеҙ!

Һәр ваҡыт үҙ-ара дуҫ булып ҡалайыҡ, һеҙҙең гимназияла белем алған уҡыусыларҙан матур мәҡәләләр, һүрәттәр көтөп ҡалабыҙ!