Рәсәй һәм Ҡаҙағстандың XX төбәк-ара хеҙмәттәшлек форумы ҡатнашыусылары һаны арта

Башҡортостан Башлығы Радий Хәбиров белдереүенсә, Өфөлә Рәсәй һәм Ҡаҙағстандың XX төбәк-ара хеҙмәттәшлек форумына 3 меңдән ашыу кеше йыйылған. Сараға 30-ҙан ашыу төбәк үҙҙәренең рәсми делегацияларын ебәргән, уларҙың етәүһе - ошо субъекттарҙың етәкселәре.

- Иртәгә Ҡаҙағстандан ҙур делегация көтәләр. Уны Премьер-министр урынбаҫары - Ҡаҙағстан Республикаһы Хөкүмәте Аппараты етәксеһе Ғәлимжан Тельман улы Койшыбаев етәкләй, уның менән бергә бик күп рәсми шәхестәр, шул иҫәптән Ҡаҙағстан өлкәләре етәкселәре килә, - тине Башҡортостан Башлығы Радий Хәбиров. - Бынан тыш, эшҡыуар йәштәр, спортсылар, мәҙәни коллективтарҙы көтәбеҙ. Шул рәүешле, ҡатнашыусылар һаны бермә-бер арта бара.

- Киләһе йыл Форум Ҡаҙағстан ерендә үтәсәк, беҙ уны юғары кимәлдә ойоштороуға ирешербеҙ, тип ышанабыҙ, - тине Алмат Аманкабжан.

❗Рәсәй һәм Ҡаҙағстан төбәк-ара хеҙмәттәшлек форумы йыл һайын ике илдең иҡтисади, мәҙәни һәм гуманитар бәйләнештәрен үҫтереү һәм яҡлау өсөн үткәрелә.
Иҫегеҙгә төшөрәбеҙ: Рәсәй һәм Ҡаҙағстандың XX төбәк-ара хеҙмәттәшлек форумы 26-27 ноябрҙә Өфөлә яңы асылған Көрәш һарайы базаһында бара.

Фото: Маргарита Истомина