“Мин – йәш Шәһитсе” башҡорт балалары журналистика мәктәбе эш башланы

Башҡортостан Башлығы Гранттары фонды ярҙамында тормошҡа ашырылған был проектҡа башҡортса яҙыша белгән ҡыҙҙар һәм малайҙар оло һынау аша үтеп тупланды: улар иншалар яҙҙы, башҡортса видеояҙмалар төшөрҙө. 4-14 йәшлек балалар менән бергә беҙ һүҙ көсө аша Башҡортостаныбыҙҙың бөгөнгө гүзәллеген, киләсәгенең күркәмлеген бергәләп ижад итәсәкбеҙ, ти “Аҡбуҙат” журналы хеҙмәткәрҙәре. Медиамәктәптә уҡыусылар башҡортса мәҡәлә яҙырға өйрәнеү, балалар баҫмаһына әкиәт ижад итеү, фото һәм видео төшөрөү оҫталығы, баҫманың макеты, вертскаһы тураһында дәрес ала. “Аҡбуҙат” журналының баш мөхәррире Лариса Абдуллина әйтеүенсә, баланы матбуғатҡа, мәҡәлә яҙыу эшенә бала саҡтан йәлеп итергә кәрәк: “Ҡыҙҙар һәм малайҙар кескәй сағынан һүҙ ҡәҙерен белһә, улар дөрөҫ итеп башҡортса ла һөйләшер, туған халҡының мәҙәниәте менән һуғарылып үҫер!” Бөгөн балалар Ш. Хоҙайбирҙин исемендәге премия лауреаты, фотожурналист Айрат Нурмөхәмәтов менән осрашып, фото төшөрөү серҙәренә төшөндә. “Аҡбуҙат” журналы хеҙмәткәре Рита Стеничкина шулай уҡ фото, видео төшөрөү буйынса оҫталыҡ дәресе бирҙе. Балаларҙы шулай уҡ Өфөнөң иҫтәлекле урындары буйлап сәйәхәт тә көтә! Бүләктәр, йәнле осрашыуҙар, ә иң мөһиме – Башҡортостан Журналистар союзы менән берлектә йәш ҡәләм оҫталарын әҙерләгән мәктәпте тамамлаусыларға "Йәш Шәһитсе" танытмаһы тапшырыласаҡ! Иртәгә, балаларҙы Ш.Хоҙайбирҙиндың йорт-музейында ҡыҙыҡлы осрашыуҙар көтә.