Балалар Ватан һаҡсыларын белеп үҫһен

Александр Доставалов баш ҡаланың 95-се мәктәбен тамамлаған. Ошо белем усағы бинаһына Рәсәй Геройы иҫтәлегенә ҡуйылған таҡтаташты асыу тантанаһында Рәсәйҙең Дәүләт Думаһы депутаты Павел Качкаев, Башҡортостандағы "Ватанды һаҡлаусылар" төбәк-ара фонды етәксеһе, Дәүләт Йыйылышы — Ҡоролтай депутаты Гөлнур Ҡолһарина, Өфөнөң Совет районы хакимиәте вәкилдәре, Александр Доставалов полкташтары, класташтары, кадеттар һәм башҡа битараф булмағандар ҡатнашты.

Павел Качкаев Псковта булған хәтирәләре менән уртаҡлашты. Унда 776-сы бейеклектә һәләк булған десантсыларға музей арнағандар. Гранитта яҡташыбыҙ Александрҙың да исеме уйылып яҙылған. Депутат яугир исемендәге батальондың да батырлыҡтар күрһәтеүенә ышаныс белдерҙе.

— Башҡортостан батырҙары менән дан тота. Александр Доставалов уларҙың береһе, Өфөлә тыуып үҫкән егет, - тиүе үҙенең сығышында Гөлнур Ҡолһарина, - Ауыр замандарҙа халҡыбыҙ гел ҡаһарманлыҡ күрһәткән, иңгә-иң терәп Тыуған ил һағына баҫҡан. Рәсәй һалдаттарының батырлыҡ, берҙәмлек, ныҡлыҡ сифаттары — ысын илһөйәрлек өлгөһө. Беҙ бөгөн тарихта яҡты эҙ ҡалдырған батырҙы хөрмәтләп иҫкә алабыҙ. Яңы быуын унан үрнәк алып үҫә.

"Ватанды һаҡлаусылар" фонды етәксеһе был ойошманың МХО-ла ҡатнашҡан ветерандарға, уларҙың ғаиләләренә ярҙам итеүе хаҡында белдерҙе. Фондтың тағы ла бурыстарының береһе — балаларҙы хәрби-патриотик рухта тәрбиәләү.

Александр Доставалов 2000 йылда 776-сы бейеклекте чечен боевиктарынан азвт иткәндә батырҙарса һәләк була. Ул үҙенең 4-се ротаһы менән ошо 776-сы бейеклектә алышҡан 6-сы ротаға ярҙамға килә. Яу ваҡытында бер нисә тапҡыр яралана, әммә көрәшеүен дауам итә. Сираттағы пуля уның ғүмерен өҙә.