БАЛАЛАР "ШҮЛГӘНТАШ" МӘМЕРЙӘҺЕНДӘ

Ер ҡуйынынан урғылған Шүлгән йылғаһы аша күперҙән уҙып Шүлгәнташ мәмерйәһенең ауыҙын күргәс, Башҡортостандың төрлө район -ҡалаларынан ғына түгел, Рәсәйҙең башҡа төбәктәренән дә йыйылған балалар, уларҙың ата-әсәһе "аһ!" итте.

Мәмерйә эсендәге ярты сәғәтлек экскурсия һәр кемдә онотолмаҫ тәьҫорат ҡалдырҙы.

"Аҡбуҙат" журналы, Бөтә донъя башҡорттары ҡоролтайы, Башҡортостандың Күсемһеҙ мәҙәни мираҫ объекттарын һаҡлау һәм файҙаланыу буйынса ғилми-етештереү үҙәге ойошторған "Боронғо дөйә" һүрәттәр конкурсында лауреат булған балаларға төп бүләк — Шүлгәнташҡа сәйәхәт ине. Ошоноң сиктәрендә улар ҡунаҡсыл Бөрйән еренә йыйылды, тантаналы тәбрикләүҙә ҡатнашты, "Шүлгәнташ" тарихи-мәҙәни музейына, Шүлгәнташ мәмерйәһенә сәйәхәт ҡылды.