Рәсәй Фәндәр академияһы президенты Александр Сергеев Башҡортостан уҡыусыларына асыҡ дәрес бирҙе

 М.С. Пинский исемендәге 83-сө инженер лицейы майҙансығында Александр Сергеев Рәсәй Фәндәр академияһы база мәктәптәренең өлкән класс уҡыусылары өсөн асыҡ дәрес бирҙе.

Хәтерегеҙгә төшөрәбеҙ, Рәсәй Фәндәр академияһының база мәктәптәре - Рәсәй Фәндәр академияһы һәм РФ Мәғариф министрлығының берлектәге проекты. Маҡсаты - фән һәм юғары технологиялар өлкәһендә артабан карьера яһау өсөн йәш таланттарҙы асыҡлау һәм әҙерләү.

Уҡыусылар менән осрашыуҙы Федерация Советының Фән, мәғариф һәм мәҙәниәт буйынса комитеты рәйесе Лилиә Ғүмәрова алып барҙы: «Башҡортостандағы биш уҡыу йортоноң Рәсәй Фәндәр академияһының база мәктәптәре иҫәбенә инеүе - төбәктең дөйөм белем биреү системаһын үҫтереүгә ҡеүәтле стимул», - тип билдәләне сенатор.

«Беҙҙең бурыс - технологик элита тәрбиәләү», тине үҙенең сығышында академик Александр Сергеев. Рәсәй Фәндәр академияһы президенты фекеренсә, республика фәнни-техник өлкәләге проекттарҙа әүҙем ҡатнаша һәм уларҙы бойомға ашыра, шуның менән илдең технологик киләсәген кадрҙар менән тәьмин итә. «Республикала Евразия ғилми-мәғариф үҙәге булдырыла, студенттарҙың яңы кампусы төҙөлә, ғалимдарға грант ярҙамы киң үҫтерелә», - тип билдәләне ул.

Мәктәп уҡыусылары әңгәмәлә әүҙем ҡатнашты һәм Александр Сергеевҡа үҙҙәрен ҡыҙыҡһындырған һорауҙарын бирҙе. Уҡыусыларҙы, академик фекеренсә, хәҙерге донъяла ниндәй һөнәрҙәр, шулай уҡ 3-5 йылдан ниндәй тармаҡтарға ихтыяж булыуы ҡыҙыҡһындырҙы. Академик, физика, химия, биологияға бәйле инженер һөнәрҙәре һәр ваҡыт актуаль буласаҡ, тигән ышанысын белдерҙе.