Мишкәләр мари телендә лә уҡый аласаҡ

Мишкәлә 2-се һанлы урта дөйөм белем биреү мәктәбе базаһында күп профилле Полилингваль мәктәп асыласаҡ. Был хаҡта 2021 йылдың 20 авгусында Мишкә районына эш сәфәре йомғаҡтары буйынса Республика Башлығы Радий Хәбиров белдергәйне.

Билдәле булыуынса, Башҡортостан биләмәһендә 105 меңдән ашыу мари йәшәй. Башҡортостан Республикаһы мәғариф системаһында мариҙарҙың туған телдә белем алыу һәм туған телде өйрәнеү өсөн барлыҡ шарттар тыуҙырылған. 16 районда һәм 2 ҡала округында балалар баҡсаларында, мәктәптәрҙә һәм йәкшәмбе мәктәптәрендә балалар туған мари телен өйрәнә.

2023 йылда Мишкә районында асыласаҡ яңы полилингваль мәктәп республикала ғына түгел, ә ил буйынса ла мари телен, мәҙәниәтен һәм тарихын тәрәндән өйрәнеү буйынса алдынғы мәктәптәрҙең береһе булып торорға тейеш.