Екатеринбург ҡалаһында йәшәгән Валерия менән Лиза «Аҡбуҙат» журналын тәүгә күрә. Ғөмүмән, 3-сө класта уҡыған был ҡыҙҙарға Башҡортостан, башҡорт халҡы, уларҙың йолалары, батырҙары, уйын ҡоралдары тураһында белеү, уларҙың легендалары менән танышыу ҙур тәьҫораттар ҡалдырҙы. «Бер республикала шулай күп милләт йәшәйҙер тип уйламай торғайныҡ», - тип тә аптыраны улар. Хәтерегеҙгә төшөрәбеҙ, 9 — 11 сентябрҙә Свердловск өлкәһендә Башҡорт мәҙәниәте һәм мәғрифәте көндәре үтә. Сараларҙа Башҡортостандың рәсми делегацияһы, шул иҫәптән Бөтә донъя башҡорттары ҡоролтайы вәкилдәре ҡатнаша. «Аҡбуҙат» журналы редакцияһы ла кескәйҙәрҙе һәм уларҙың ата-әсәләрен журнал менән таныштыра.