"Тамыр"ҙарҙың ике эше "МедиаБренд" конкурсы финалына сыҡты! 

“Тамыр” балалар һәм үҫмерҙәр телеканалының ике эше “МедиаБренд” дизайн һәм промоушен конкурсы финалына сыҡты. Быйыл конкурста 83 ҡатнашыусы компаниянан 878 эш ҡатнаша.

 “Төбәк телевидениеһының иң яҡшы проморолигы” номинацияһында “Тамыр” Бүрәттәрҙең  - «АригУс», Мәскәүҙең - “М24” һәм Краснодар крайының “Кубань24” каналдары менән көс һынашасаҡ.

Ә “Иң яҡшы ивент” номинацияһында башҡорт телеканалы НТВ, 5-се канал, START видеосервисы менән  шорт-листа бер рәттә. Жюри “Бирешмә” балалар премияһының презентацияһын юғары баһаланы.

“МедиаБренд” конкурсы йылына бер тапҡыр уҙғарыла, заманса медиа-маркетинг һәм дизайн өлкәһендә иң яҡшыларҙы асыҡлауға йүнәлдерелгән. Еңеүселәрҙе 13 сентябрҙә Мәскәүҙә бүләкләү тантанаһында иғлин итәсәктәр.