“Тамыр” каналы Рәми кисәһен уҙғарҙы

12 февраль баш ҡалабыҙҙың “Родина” кинотеатрында “Тамыр” каналы балалар өсөн бөйөк шағирыбыҙ Рәми Ғариповтың тыуыуына 88 йыл тулыу айҡанлы матур, йөкмәткеле сара уҙғарҙы. Унда шағир ижадына һәм тормошона арнап төрлө йылдарҙа төшөрөлгән “Сәңгелдәк” тапшырыуҙары, шулай уҡ Гәлсәр Байғусҡарова башҡарыуында ижадсының “Умырзая” шиғырына төшөрөлгән клип күрһәтелде, йәш таланттар Арслан Ҡырымсурин менән Рафаэль Никитин башҡарыуында халыҡ шағирының шиғырҙары яңғыраны. Шулай уҡ кисәлә шағирға арнап төшөрөлгән тапшырыуҙарҙың сценарий авторы, шағирә Гөлнара Хәлфетдинова ла сығыш яһаны, ул “Сәңгелдәк”тәрҙе төшөргән саҡтағы ҡыҙыҡлы хәлдәр хаҡында һөйләне. Сара юғары рухта –Рәми Ғариповтың “Туған тел” шиғырын күмәкләп уҡыу менән тамамланды.