Күргәҙмәләргә рәхим итегеҙ!

Республика Хәрби дан музейында "Рәсәй. Донбасс. Махсус хәрби операция" күргәҙмәһе асылды. Витриналарҙа хәрби хәрәкәттәр зонаһынан килтерелгән 100-ҙән ашыу әйбер ҡуйылған: ҡорал фрагменттары, хәрби форма, яугирҙарҙың шәхси әйберҙәре. Яңы экспозицияла тәҡдим ителгән уникаль экспонаттар иҫәбендә – республика Башлығы Радий Хәбировтың музейға бүләк иткән «Геройҙар иле – ваҡыт йылғаһы» картинаһы. Авторы - мотоуҡсылар полкы яугиры Артур Хәсәнов.

"Армия мәҙәниәте көндәре" сиктәрендә Башҡорт опера һәм балет театрында Рәсәй художество Академияһының ағза-корреспонденты, хәрби хеҙмәт ойошмаһында ҡатнашыусы, Хәрби хәрәкәттәр ветераны Юрий Сивачевтың «Беҙҙең заман геройҙары» һәм Мәскәү рәссамдар союзы һәм Рәсәй рәссамдар ижади союзы ағзаһы, күп һанлы Рәсәй һәм сит ил күргәҙмәләрендә ҡатнашыусы Сергей Марченконың «Донбасс Күмере. Еңеү йөҙҙәре" экспозициялары асылды. Күп кенә эштәр туранан-тура махсус хәрби операция зонаһында башҡарылған. Яугирҙарҙың, ирекмәндәрҙең, ветерандарҙың портреттары килгән ҡунаҡтар араһында ҙур ҡыҙыҡһыныу уята.

Башҡортостандың Милли музейында «Мәҙәниәт Армияһы» һәм «Рәссам күҙҙәре менән» күргәҙмәләре асылды. "Мәҙәниәт армияһы" күргәҙмәһендә музей ҡунаҡтары Рәсәй Федерацияһы Ҡораллы көстәренең Үҙәк музейы йыйылмаһынан Еңеү Байрағының күсермәһен, артистарҙың сәхнә костюмдарын, наградаларҙы, мәҙәни фронттағы ҡаҙаныштарҙы раҫлаған әйберҙәрҙе ҡарай ала. "Рәссам күҙҙәре менән" күргәҙмәһендә баталист рәссам һалдаттарҙың ауыр көндәрен, уларҙың батырлығын һәм ҡаһарманлығын, табиптарҙың фиҙакәрлеген һәм һуғыш осороноң лирик мәлдәрен һүрәтләй. Күргәҙмә 21 сентябргә тиклем эшләйәсәк.

"Армия мәҙәниәте көндәре" проекты сиктәрендә күргәҙмәләргә инеү бушлай!

Күргәҙмәләр һәм башҡа саралар буйынса тулыраҡ мәғлүмәт менән "Башҡортостандың Мәҙәни донъяһы" порталында танышырға мөмкин (kulturarb.ru/ru/dak-rb)

Фотола: Башҡорт дәүләт опера һәм балет театры күргәҙмәһе.
Юлай Кәримов фотолары.