ИҒТИБАР! ЯҢЫ РУБРИКА!

Салауат менән Самат көлдөрә

Салауат, Самат, Хаммат - бер туғандар. Салауатҡа - 8 йәш, ул Өфө ҡалаһы 88-се мәктәбенең 2"д" класы уҡыусыһы. Самат 257-се балалар баҡсаһына йөрөй. Хамматҡа әле 1 генә йәш.

Көндәр йылы торғас, бәпесте яланбаш йөрөттөм. Кисә һалҡын кеүек булғас, чепчик кейҙереп һалып ҡуйҙым. Быны күргән Салауат: "Нимәгә быны кейҙерҙең ул, намаҙ уҡыймы әллә?", - тип һорап ҡуйҙы.

*
Салауат, алыҫтағы торбаларҙан сыҡҡан төтөндө күрһәтеп:
- Әсәй, анау нимә ул?
Мин:
- Унан беҙгә йылылыҡ ебәрәләр.
Самат:
- Юююҡ, унда болот эшләйҙәр.
*
"Тышта эҫе", "тышта һалҡын", "тышҡа сыҡһаң башыңа кей", "тышҡа минең рөхсәтһеҙ сыҡмағыҙ" тигән һүҙҙәрҙән әҙерәк ялҡып китте шикелле Салауат:

- Һин что, тыштың Королеваһы? - тип һорап һалды.
*
Йыш ҡына ике малайҙың сәсен үҙемә алырға тура килә. Бөгөн дә сәстәрен алырға әҙерләнеп йөрөйөм. Самат һәр ваҡыттағыса ҡаса башланы.
- Сәсең кәпәс кеүек булып китте, - тием.
Тел биҫтәһе Салауат үҙенсә ағай булып:
- Хәҙер алдырмаһаң кәпәс була, шунан бапаҡҡа әйләнә, аҙаҡ вообще ҡыҙыҡай булаһың, - ти.
Самат ылдый килеп сәсен алдырҙы.

Шуҡ малайҙарҙың әсәһе - Рүзилә Иҫәнбаева.