ЕҢЕҮ ҺАЛДАТЫ

Бөгөн мәктәптә тантаналы сара үтте. Ниндәйҙер ағай-апайҙар килеп, Нуримандарҙан өлкәнерәк класта уҡыусы малайға миҙал тапшырҙы. Баҡһаң, ул малай батырлыҡ эшләгән икән: янғын ваҡытында ике баланы ҡотҡарған. – Атай, ә нисек итеп батырлыҡ эшләйҙәр ул? – тип һораны атаһынан Нуриман мәктәптән ҡайтып инеү менән. Уның да, теге малай кеүек, батыр булғыһы килә ине. – 9 май байрамы яҡынлаша, оҙаҡламай олатайҙарға ҡунаҡҡа ҡайтабыҙ. Шунда олатайыңдан барыһын да һорашырһың, йәме, улым! – Нишләп олатайҙан һорарға? – тип ҡыҙыҡһынды Нуриман. – Олатайың бит һуғышта ҡатнашҡан. Ул – Бөйөк Ватан һуғышы ветераны. Батырлыҡ өсөн орден-миҙалдар менән бүләкләнгән, – тине атаһы. Байрам көндәрен бик түҙемһеҙләнеп көттө малай. Машинанан һикереп төшөү менән, Нуриманды олатаһы ҡосаҡлап алды. – Ҙур үҫеп, егет булып киткән улым! – тине үҙе ҡыуанып. – Ҡайһылай күп миҙалдар тағып алғанһың! – күҙҙәрен ялтыратып, Нуриман һәр береһен тотоп ҡараны. – Бөгөн Еңеү көнөнә арналған осрашыуға саҡырҙылар, шуға әҙерләнәм, – тине олатаһы. – Ә һин ысынлап та һуғышта булдыңмы, олатай?! – Миңә егерме йәш ине һуғыш башланғанда. – Ә һин әтеү һалдат булдыңмы, мылтыҡ та тота беләһеңме? – Эйе, өйрәндем инде. Немец илбаҫарҙарына ҡаршы аяуһыҙ алыштыҡ бит. – Был миҙалды нимә өсөн бирҙеләр? – Нуриман һорауҙарын теҙҙе генә. – Белоруссия фронтында, ҡаты һуғыш барғанда, бик күп ауыл-ҡалаларҙы фашистарҙан азат иттек. Яу яланынан яралыларҙы алып сыҡтыҡ... – олатаһының күҙҙәре йәшләнде. – Һәр миҙалдың үҙ тарихы, улым! – Минең дә һинең һымаҡ батыр булғым килә, олатай! – Атай-әсәйеңә ярҙам ит, яҡшы уҡы! Шул саҡта батыр, ҡыйыу булып үҫерһең! – Олатаһы һөйәлле ҡулдары менән Нуримандың арҡаһынан яратты.