+15 °С
Облачно
75 лет Победы
Бөтә яңылыҡтар

АМЕРИКА БАЛАЛАРЫНА БАШҠОРТОСТАНДА ЙӘШӘҮ НЫҒЫРАҠ ОҠШАЙ!

Өфө янындағы Шамонин ауылында ғәжәп, ихлас, киң күңелле кешеләр йәшәй. Унда хатта Американан килеп, ошо ауылды төйәк итеп, башҡаларҙан бер нәмәһе менән дә айырылмай йәшәп ятҡан ғаилә лә бар. Шамонин төҙөлә башлағандағы юл булмау, йә ут һүнеп, йә һыу булмай ҡаңғыртыуҙарҙы ла сабыр үткәрҙе улар. Күсенеп килгәндә бер улдары бар ине, әле иһә ошо ерҙә тағы өс балаға ғүмер бирҙеләр.

Өлкән улдары мәктәптә уҡый инде. "Дарман" халыҡ бейеү ансамблендә шөғөлләнә. Башҡорт бейеүҙәрен ысын башҡорт егетеләй эске бер рух менән башҡара ул. Уҡ атыу түңәрәгенә лә ихлас йөрөй. Ул балалар баҡсаһына йөрөгәндә башҡорт төркөмдәре асылмаған була әле, шуға ла рус төркөмөнә бирәләр. Әммә бәләкәй ике игеҙәкте уйлап та тормай башҡорт төркөмөнә бирҙеләр. "Башҡорттарҙың сабырлығы, тыныслығы, ихласлығы оҡшай беҙгә. Улдарыбыҙ башҡорт төркөмөндә үҙҙәрен өйҙәгеләй хис итә. Инде башҡортса ла, һөйләшмәһәләр ҙә, буйтым аңлайҙар, - тип фекерҙәре менән уртаҡлашты әсәләре Эйми Саваж. - Байрамдарға арнап үткәрелгән иртәлектәр һоҡландыра. Бәләкәс кенә балалар ҙа шулай ҙур һәләткә эйә була ала икән! Күпме шиғырҙар ятлайҙар, йырҙар өйрәнәләр, уйындар беләләр..." Америкала иһә иртәлектәр беҙҙәге кеүек үк ихлас үтмәй икән.
Йәнә бындағы балаларҙың көндәр буйы тышта, саф һауала уйнауҙары оҡшай өлкән Саваждарға. Һәр хәлдә компьютерға, телевизорға текәлеп ултырмайҙар, бала саҡтары бала саҡтағылай үтә, ти Эйми. Шуғалыр ҙа малайҙар Америкала өләсәһе менән олатаһында ҡунаҡта саҡта иртәнән кискәсә тышта төрлө уйындар уйнауҙы, туп һуғыуҙы, ҡышын ҡарҙа аунауҙы, башҡорт дуҫтарын һағынып ҡайта.