+12 °С
Ясно
Әкиәт иленә сәйәхәт
15 Августа 2021, 16:14
Ниңә бесәй ашап туйғас йыуына?
* * * Оҙон каникулдар үтеп китеп бара. Мәктәпкә әҙерленергә, уҡырға, ҡабатлау таблицаһын иҫкә төшөрөп нығытырға һ.б., һ.б. ... Әйҙәгеҙ, бөгөндән әҙерлекте башлайбыҙ. Был әкиәтте өлкәндәрҙән түгел, ә үҙегеҙ уҡығыҙ! Һуңынан ҡусты-һеңлеләрегеҙгә һөйләгеҙ! Мәктәпкә барғас, уҡытыусығыҙ тырышлығығыҙҙы күреп баһаламай ҡалмаҫ. Уңыштар! Ә иртәгә һеҙҙе икенсе эш көтә...
Ниңә бесәй ашап туйғас йыуына?
(Литва халыҡ әкиәте.)
Бер саҡ турғай ишек алдына осоп төшә лә бойҙай сүпләй башлай. Ә хужаның бесәйенә шул ғына кәрәк. Ҡошсоҡто эләктереп тә ала.
- Һине ашаһам килешер ине! - ти.
- Һеҙ нимә, пан бесәй! Мине ашарға итәһегеҙме? - тип сырылдай турғай.
- Ашамай, ҡарап ултырып булмай бит инде! - тип мырылдай бесәй.
- Пан бесәй! Туҡтағыҙ! Ашар алдынан йыуынығыҙ! - ти ҡошҡай.
- Ысынлап та! - ти бесәй. Моронон һөртөр өсөн тәпәйен күтәрә. Ҡош осоп та китә.
- Юҡ, башҡаса алдай алмаҫһың! - тип мыяулай бесәй. - Инде ашағас ҡына йыуынам!
Шунан бирле бесәйҙәр ашап туйғас ҡына йыуына икән.
