ӘКИӘТ ИЛЕНӘ СӘЙӘХӘТ

Зөһрә БӘШӘРОВА Иң матур сәскәӘсәһе сәскә кеүек матур ҡыҙын яратып, Гөлдәр тип исем ҡушҡан икән. Һәр ҡыҙ кеүек ул да сәскә яратҡан. Уларҙың баҡсаһында ниндәй генә сәскә үҫмәгән?! Ал, ҡыҙыл, һары, көрән раузалар, пион, гладиолус, лилиә, ләләләр - үҙен дә яратҡандар, ти. "Ниндәй матур ҡыҙыҡай! Ул беҙҙе ярата, болот ағай арып китһә, һыу ташып ҡойондора. Рәхмәт уға!" - тип, йылмайғандар, ти. Уларҙың телен аңлаған ҡыҙ, йомшаҡ ҡулдары менән баштарынан һыйпаған. Сәскәләр, уға рәхмәт әйтеп, тирә - йүнгә хуш еҫтәрен бөрккәндәр, ти. Берҙән - бер көндө ҡыҙ баҡсала сәскәләр менән һөйләшкәндә, кемдеңдер һулҡылдағанын ишеткән.-Һин кем? Ниңә күҙ йәше түгәһең? - тип, ситтәге бер мөйөштә селбер генә һипкелле йөҙөнә ҡыҙыл яулыҡ ябынған, йәшел күлдәк кейгән илаҡты күреп ҡалған.-Мине яратмайҙар... - тигән сәскә.-Ниңә улай тиһең? Исемең нисек, һылыуҡай? - тигәндәр ти сәскәләр, аптырап.- Мәәәк... Мин - зәғиф, - тигән ти ҡалтырап, таныш түгел сәскә.- Ниңә улай тиһең? Туғандарың ҡайҙа? - тигән, ти, бөтәһе лә аптырап.

-Туғандарымды йолҡоп алып киттеләр. Уларҙың яулығын ҡырҡҡыслап, ҡурҡыныс ағыу эшләйҙәр. Минең кешеләрҙе ағыулағым килмәй. Минең дә һеҙҙең кеүек һылыу сәскә булып баҡсаны матурлап, Гөлдәр апайҙы ҡыуандырғым килә. Мииин йәәәшееендееем,- тип, шыңшып, селбер генә сәскә ергә һуҙылып ятҡан, ти.

- Илама, тор! - тип йыуатҡандар ти уны сәскәләр. -Гөлдәр апай һине дауалар. Апайҙары шишмәгә йүгергән һәм уны көн дә тиерлек һыуҙа ҡойондорған ти. Мәк иң матур сәскәгә әйләнгән, ти. Бөтәһе лә уға һоҡланған, ти. Йәйҙең иң матур көнөндә Гөлдәрҙең әсәһенең тыуған көнө икән.

Ҡыҙ баҡсаға инһә, бөтә матурҡайҙар ҙа изге күңелле ҡыҙҙың әсәһенә бүләк булғыһы килеп, уны ҡотларға теләгән, ти. Ул ҡайһыһын һайларға белмәгән. Рауза апайҙың үҙен саҡырғандар. Ул үҙенә бүләк итеп кемде һайлаған икән тип уйлайһығыҙ? Ул мәкте һайлаған, ти. Әлбиттә, мәк быға ныҡ ҡыуанған ти. Үҙен һайлағанға ҡыуанып аҫҡа ҡараған икән, ваҡ ҡына ҡап -ҡара орлоҡтары ергә һирпелгән.

Яҙын шул орлоҡтарҙан үҙенә оҡшаған матур сәскәләр үҫеп сыҡҡан. Алтын көҙ еткәс, уларҙың бешкән ҡара орлоҡтары:

-Беҙ тәмлебеҙ, хуш еҫлебеҙ, икмәккә ҡушығыҙ, - тигәс, кешеләр шулай эшләгәндәр ҙә.

Гөлдәр мәктең орлоҡтарын кешеләргә таратҡан, ти. Уларҙың баҡсаһын да ошондай ғәжәйеп сәскәләр йәмләй икән.

Читайте нас:

Об использовании персональных данных

Ойоштороусылары: Башҡортостан Республикаһының Матбуған һәм киң мәғлүмәт саралары буйынса агентлығы; Башҡортостан Республикаһының Яҙыусылар союзы.

Баш мөхәррир Абдуллина Лариса Хашим ҡыҙы

Телефон

89659441892

Электрон почта

akbuzat-journal@yandex.ru

Адресы

г. Уфа, ул. 50 лет Октября, 13, 1 этаж

Реклама хеҙмәте

(347) 2927761

Редакция

(347) 2927761

Ҡабул итеү бүлмәһе

(347) 2927761

Хеҙмәттәшлек

89659441892

Кадрҙар бүлеге

8(347)272-42-07