+18 °С
Болотло
VK
Бөтә яңылыҡтар
Әкиәт иленә сәйәхәт
7 Апрель 2021, 15:15

ХИКӘЙӘЛӘР ДОНЪЯҺЫ

Фәнил КҮЗБӘКОВЯрҙамсы ҡыҙ(Хикәйә)Зөлфиәгә өс йәш тулыр алдынан әсәһе дауахананан ҡусты алып ҡайтты. Ҡыҙ эй ҡыуанды, янынан китмәне. Үҙе бер туҡтауһыҙ тәтелдәне:— Әсәй, ниңә ул бер нәмә лә белмәй – имергә генә белә! Ә ҡасан һөйләшә башлай?— Әле бәләкәй бит әле.— Ә мин ҡасан һөйләшә башланым?— Һиңә һигеҙ ай тулғанда иң беренсе “Әт—тә” тип телең асылды.Ҡыҙ әсәһенең бөтә иғтибары тик ҡустыһында икәнен ҡарап торҙо ла, үпкәләп, атаһы янына йүгерҙе.— Атай, һөйлә әле, мин бәләкәй саҡта нисек инем?..

— Һин бәләкәйҙән бигерәк аҡыллы булдың. Бер йәшең дә үк уйынсыҡтарыңды үҙең йыйҙың. Ҡурай тауышын ишетһәң, сәпәкәй итеп бейей, әкиәт батырҙарын яттан белә, ә ҡайһы саҡ көлдөрөп тә ала инең.
— Ә нисек итеп?
— Мин һине яратып: “Зөлфиә тәмле, ҡолағын ҡабайым әле!” тим, ә һин: “Юҡ, тәмле түгел!” тип яуаплайһың. Йә ултырғысҡа менеп баҫаһың да: “Ҡарағыҙ, мин ниндәй ҙур!” тип маҡтанаһың. Ә үҙеңә кәрәккәндә: “Мин бәләкәй ҙә инде – бәләкәй ҡалаҡ бирегеҙ, бәләкәй тәрилкә...” — тиһең.
— Атай, ә нисек миңә, ысынлап, тиҙерәк үҫергә? – ти ҡыҙ тағы иркәләнеп.
— Әсәйеңә ҡустыңды ҡарашырға ярҙам итһәң, үҫкәнеңде һиҙмәй ҙә ҡалырһың.
Ҡыҙ, әсәһенә үпкәһен онотоп, балалар бүлмәһенә йүгерә:
— Бына ҡара! Мин ниндәй ҙур. Һин дә үҫерһең. Һиңә лә тыуған көнөңә матур күлдәк алып әпирерҙәр. Тыңлаһаң, әкиәт тә уҡырҙар...— тип мыжыған ҡустыһын бәүетә башлай.
— Күрәһеңме, ниндәй ярҙамсың бар. Инде минең кәрәгем дә булмаҫ инде, — ти атаһы шаяртып әсәһенә.
Читайте нас: