ӘКИӘТТӘ ҠУНАҠТА

Артур ВАСИЛОВ Йофарҙың төшө ҡайҙа булған?Томанлы иртәлә ысыҡ тамсыларын эсә-эсә, Уҡ исемле сысҡан ялан буйлап сәйәхәткә сыға. Ҡапыл үлән араһында мамыҡҡа оҡшаған әйбер күреп ҡала. Яҡыныраҡ барһа, аҡ болот һымаҡ күренә, үҙе төрлө төҫ һибеп ялтыраған да кеүек. Ҡурҡыныс янамағас, ҡыйыуланып китеп, алдына барып баҫа ла иғтибарлап ҡарай башлай. Башы, аяҡтары, оҙон ғына танауы ла бар һымаҡ, ә күҙҙәре йомоҡ. Бәлки, ул йоҡлайҙыр, тип уйлай сысҡан Уҡ. Уйлана-уйлана, йылға ярына барып еткәнен һиҙмәй ҙә ҡала. Ниндәйҙер ҡыштырлау уны һиҫкәндереп ебәрә. Томандан асылған яр ситендәге сытыр араһында ҡыуыш күренеп ҡала. Был ерҙәрҙе күптәнге дуҫы йофарҙың хужалығы икәнен белә ине Уҡ. Бына үҙе лә күренә. Ҡайырҙан эшләнгән ишеген ҡыялап асҡан да ояһы эргәһендә танау аҫтынан ғына нимәлер мыңғырлап ултыра.- Хәйерле иртә!— тигән сысҡан Уҡ.- Бер ҙә хәйерле түгел, сәләм, — тигән кәйефһеҙ Йофарбай.- Нимә булды? — тип аптыраған сысҡан Уҡ.— Беләһеңме, ямғыр яуа башлағас тыныс ҡына ял итергә инеп яттым, — тип ҡабалана-тотлоға һөйләй башлай Йофарбай.— Мамыҡтай аҡ ҡына, болоттай йомшаҡ ҡына, йылтырап торған төш күреп йоҡлай инем. Ҡапыл дөбөр-шатыр килеп йәшен атмаһынмы...