-22 °С
Болотло
75 лет Победы
Бөтә яңылыҡтар
Дөйөм мәҡәләләр
29 Март 2020, 21:00

Ҡунаҡһыҙ үткән өс йәш йәки башҡаларҙың тыуған көнөнә талашҡан ҡыҙыҡай тураһында

Ҡунаҡһыҙ үткән өс йәш йәки башҡаларҙың тыуған көнөнә талашҡан ҡыҙыҡай тураһындаБәләкәй саҡта һәр кем тыуған көнөн түҙемһеҙләнеп көтөп ала, яҡындарынан төрлө серле бүләктәр көтә. Өфө ҡыҙы Индира Яҡупова ла өс йәшен күптән көтөп йөрөй, ҡунаҡтар ҙа саҡырып ҡуя.Эх, кем уйлаған инде был көндә бөтә донъя тиерлек карантинда ултырыр тип. Әммә, ҡунаҡҡа ла, магазинға ла йөрөргә ярамаһа ла, сабый күңеле бит иғтибар, мөғжизә көтә! Ярай ҙа, өйҙә әсәһе, Арслан ағаһы һәм ике айлыҡ ҡына Әдилә һеңлеһе бар. Ҡарағыҙ әле, уға үҙе яратҡан йәнһүрәт геройын һынландырып ниндәй тәмле торт бешергәндәр, ҡағыҙҙарҙан матур-матур сәскәләр һәм өс һанын эшләгәндәр. Алыҫ Себерҙә эшләгән атаһы, өләсәй-олатайҙары һәм башҡа туғандары ла шылтыратып ҡотлаған. Индира уларға яуап итеп үҙе яратҡан “Бесәйем” йырын йырлаған һәм ватсап аша видеобәйләнешкә сығып бейеп тә күрһәткән. Унан инде ҡурсаҡтарын теҙеп ултыртып тыуған көн үткәргән, тәмле торт барыһына ла еткән. Әйткәндәй, Индира ике ай элек кенә

апай булып киткән, уғаса шул тиклем иркә ҡыҙ булған, үҙенә исеме менән өндәшергә лә рөхсәт итмәгән, бөтәһе лә уны “хан ҡыҙы” йә “принцесса” тип кенә йөрөткән. Тағы ла ул башҡаларҙың тыуған көнөнә талашып мәж килгән, әсәһе берәй туғандарын тыуған көнө менән ҡотлағанын ишетеп ҡалһа, юҡ, ул апайҙың йә ағайҙың тыуған көнө түгел, минеке тип мыжып-илап, үҙенә торт алдыртҡан, шулай итеп үҙһүҙле һәм иркә ҡыҙыҡай башҡа кешенең тыуған көнөн тартып алдым икән тип ҡыуанған. Был ғәҙәтен ул Әдиләгә апай булғас ҡына ташлаған. Апай булыуҙы ла ул башта бик ауыр кисергән, атай минеке генә тип, атаһына бәләкәс Әдиләгә бөтөнләй ҡарарға ла рөхсәт итмәгән, хатта елкәһенә менеп, күҙен ҡаплап ултырған. Әммә ике ай эсендә ҡыҙыҡай бик үҙгәргән, бөгөн ул һеңлеһен ҡәҙер итеп кенә тора, әсәһенә уны ҡарарға яраҙам да итә, хатта һауыт-һаба йыуыша икән.
Индираның ҡыҙыҡтары бик күп. Мәҫәлән, ул өйҙәрендәге саң һурҙырғыс, иҙән йыуғыс роботты тере йән эйәһе икән тип уйлай һәм унан әҙерәк шөрләй. Яңыраҡ, әсәһе күрмәгәндә, иҙән йыуып йөрөгән робот-саң һурҙырғыс менән дуҫлашырға уйлаған да, уға шоколадлы эремсек ашатҡан. Саң һурҙырғыс робот “Юҡ!” тимәгән, эремсекте йотҡан да ҡуйған, шунан артабан эшләп йөрөгән дә, эремесек иҙәнгә һыланып бөткән. Әсәһе күреп ҡалғанда инде бөтә иҙән майлы, шоколадлы ғына булып ялтырап ятҡан. Ни эшләһендәр, роботтың эсен таҙартып йыуып, бүтән тәмлекәс ашамаҫҡа ҡушып, иҙәнде яңынан йыуҙырғандар. Үәт, шундай тиктормаҫ ҡыҙ үҫә Һупайлы биҫтәһендә! Әйҙәгеҙ, тыуған көнө ошо илебеҙ өсөн тынғыһыҙ мәлгә тура килгән бәләкәс ҡыҙсыҡты матур байрамы менән ҡотлайыҡ әле, әтеү алдан саҡырған ҡунаҡтары килмәгәс, бер аҙ эсе бошоп тора үҙенең!
Читайте нас в