Мәскәү ҡыҙы Милана

Милана шул тиклем телдәр, төрлө образдарға инеп, онотолоп уйнай, әсәһе уны көнө-төнө һөйләй ҙә һөйләй тип шаярта. Йәнә лә бер шөғөлө бар, ул да булһа видео төшөрөү. Тиктормаҫ, һәләтле ҡыҙыҡай ҙур үҫкәс гимнаст йә актриса булырға хыяллана. Әле беренсе класҡа төшөргә әҙерләнә, китаптар уҡырға ла әүәҫ. Матур йәй көндәрен иһә Башҡортостаныбыҙҙың Әбйәлил һәм Туймазы райондарында уҙғарырға ярата. Сабый ғына сағынан Хәмит ауылында йәшәгән Зифа өләсәһе менән еләккә, көртмәлегә йөрөй. Өләсәһе уның ҡулының тилберлегенә аптырап бөтә алмай, еләк йыйған саҡта бер бөртөгөн дә ауыҙына ҡапмай, күнәген йәһәт кенә тултырып ҡуя. Иң ҡыҙығы, үҙе йыйған еләк-емеште башҡаларҙыҡы менән ҡуштыртмай, аҙаҡ мотлаҡ үҙе менән Мәскәүгә алып ҡайта. Ә инде ҡыштарын әсәһе Айгөл Дәүләт ҡыҙы менән тәмле ҡайнатмалы сәй эсеп, яңы көнгә көс туплайҙар. Мәскәү ҡыҙы Миланаға киләсәктә лә шулай өлгөр һәм тырыш булып ҡалыуын теләйем, һәр ваҡыт юлдарың асыҡ булһын, маҡсатлы һылыуҡай!