“Аҡбуҙат”тан һөйөнсө бар!

Унда “Аҡбуҙат” журналы үҙенең Республика башлығы грантына быйыл тормошҡа ашырып килгән эштәрен күрһәтәсәк. Башҡорт теле байрамында тиҙҙән донъя күрәсәк “Урал батыр” йәнһүрәтенә тизер һәм унан өҙөктәр (рәссамы – Дамир Мөхәмәтйәнов) ҡарарға мөмкин буласаҡ, шулай уҡ “Урал батыр” эпосына нигеҙләнеп эшләнгән комикстар китабына ла презентация үтәсәк. Сараға килгән бәләкәстәрҙе Урал батырҙың ҡатырғанан эшләнгән ҙур һыны ҡаршы аласаҡ, ә журналдың “Оҫта ҡулдар” рубрикаһы ҡыҙҙар-малайҙарға буям (раскраска) буяу һәм йәнһүрәт геройҙарының һындарын ҡырҡып эшләү буйынса уйындар тәҡдим итәсәк. Бер һүҙ менән әйтәкәндә, “Башҡорт теле көнө”ндә “Аҡбуҙат” туҡталҡаһын урап үтмәгеҙ, һеҙҙең өсөн балалар журналы хеҙмәткәрҙәре күңелле һәм ҡыҙыҡ сара әҙерләй!